Gjykimi i pesë minoritarëve grekë, qytetarë të Republikës së Shqipërisë, të akuzuar për lidhje me qarqe të caktuara qeveritare dhe shërbimet e fshehta greke për shkëputje të territorit të Shqipërisë, është incidenti i fundit në vargun e incidenteve të tjera midis Greqisë dhe Shqipërisë, i cili po shfrytëzohet pa skrupull nga propaganda greke në të gjitha nivelet për qëllimet e saj antishqiptare.

Nuk është hera e parë që propaganda greke, vegël e zellshme e qarqeve shoviniste greke, synon t'i paraqesë gjërat në dritën që i pëlqen. Këto qarqe harrojnë se Shqipëria është një shtet sovran dhe është e drejtë e saj të kërkojë prej të gjithë qytetarëve, qofshin këta edhe minoritarë, t'ia nënshtrojnë ligjit veprimtarinë e tyre dhe të japin llogari, në qoftë se kjo veprimtari shkon në dëm të interesave kombëtare.

Por qëllimi i vërtetë i kësaj propagande nuk është aq mbrojtja e të akuzuarve, se sa acarimi i mëtejshëm i marrëdhënieve me Shqipërinë, krijimi i precedenteve për t'i lëne derë të hapur shovinizmit grek që të realizojë ëndërrën e kahershme të helenizimit të Shqipërisë së Jugut.

Për këtë ajo ka shfrytëzuar çdo incident, duke filluar nga akuzat për keqtrajtimin e minoritetit grek, në kohën që Greqia dihet botërisht se është shteti më intolerant ndaj minoriteteve (le të kujtojmë shqiptarët etnikë të Çamërisë, të dëbuar me dhunë nga tokat e tyre, shtypjen e çdo përpjekjeje të shqiptarëve në Greqi jo për t'u arsimuar në gjuhën shqipe, por për ta folur atë dhe për t'u identifikuar me emrin shqiptar. Po kështu ajo është sjellë me minoritetin maqedon, turk etj.).

Edhe në nivelin e politikës shtetërore, Greqia nuk ka ngurruar të bëjë presione e shantazhe, duke ndërmarrë veprime të ulta e meskine, si dëbimi me dhunë i shqiptarëve të punësuar përkohësisht në Greqi, keqtrajtimi i tyre çnjerëzor në pikat kufitare, kërcënimi i vazhdueshëm për dëbimin e emigrantëve ekonomikë etj. Në kohën që gjithë bota përpiqet të ndihmojë demokracinë e re shqiptare, Greqia, si kryetare e radhës së Bashkimit Evropian, bëri ç'është e mundur që Shqipërisë të mos i jepet huaja e caktuar nga ky institucion.

E përkdhelur nga Perëndimi, e rimbëkëmbur ekonomikisht prej tij, qarqet shoviniste greke tani e kanë kthyer timonin nga ana e Lindjes, nga aleatët e dikurshëm sllavo-bizantinë. Ato duan t'i rikthejnë vetes pozitën drejtuese që kishin në perandorinë sllavo-bizantine . Me ta e lidh Greqinë edhe endërra e vjetër për copëtimin e Shqipërisë. Prandaj, nuk na çudit aspak fakti që këto qarqe janë këshilltaret dhe ndihmësit më të devotshëm të qarqeve reaksionare shoviniste serbe me në krye Millosheviqin dhe politika e tyre në Ballkan është në unison. Një nga qëllimet e qarqeve shoviniste greke për mbajtjen në tension të marrëdhënieve me Shqipërinë, është edhe ndihma për aleaten e vjetër Serbinë, e cila është ballafaquar me zgjidhjen e problemit të Kosovës.

Por, qarqeve shoviniste greke dhe propaganduesve të tyre të zellshëm duhet t'u përsërisim edhe një herë se Shqipëria është një shtet sovran, që u krijua pa marrë parasysh pengesat e panumërta nga ana e fqinjëve të saj shovinistë. Shqipëria nuk është një vend ku ata mund të shijnë lëmë si të duan për arritjen e qëllimeve të tyre: helenizimin e Jugut dhe shpërbërjen e e saj.

Ligjet e shtetit shqiptar duhet të zbatohen me drejtësi ndaj të gjithë shtetasve pa ngurrim, pa marrë parasysh kërcënimet e shantazhet e shovinistëve grekë apo të kujtdo qoftë.

Back to Top